Taga Dep’t of Justice ipaimbestigar sab

CEBU, Philippines — Si Presidente Rodrigo Duterte angay’ng mosusi kon ang mga sakop sa Department of Justice (DOJ) misuporta ba sa iyang kampanya pagsumpo sa problema sa ilegal nga drugas sa nasud.

Kini ang reaksyon sa kontrobersyal nga opisyal sa kapolisan nga si Chief Inspector Jovie Espenido human nga ang special panel of investigators sa DOJ mirekomendar pag-dismiss sa kaso batok nila ni Peter Lim, Kerwin Espinosa ug kaubanan nga giingong mga ‘drug lord.’

Nahibaw-an nga si Espenido maoy mipasaka og kaso batok ni Espinosa, apil sa iyang amahan nga mayor kaniadto sa Albuera, Leyte, sa wala pa siya mabalhin sa Ozamiz City.

Matud ni Espenido nga ang pagrekomendar sa DOJ investigators nga ibasura ang kaso batok ni Lim, Kerwin ug kaubanan, makahatag og bati nga dungog sa kampanya sa presidente batok sa drugas.

Samtang si Mayor Tomas Osmeña nalipay sa pasalig ni Duterte nga iyang ipa-review ang findings sa special investigators sa DOJ, aron pagsuta kon tinuod ba nga wa’y basehanan ang pagpasaka kanila og kaso. Ang kadagkoan sa Criminal Investigation and Detection Group (CIDG)-7 miingon nga mopadayon sila paghipos og mga ebidensya batok ni Lim nga gipasanginlang nalambigit sa drugas. Gitataw hinoon ni CIDG-7 director Royina Garma nga nagkinahanglan gyud sila sa tabang sa katawhan kon may kasayuran sila sa giingong pagkalambigit ni Lim sa drugas.

Si Justice Secretary Vitaliano Aguirre nangatarungan nga bisan og si Kerwin miangkon atol sa Senate hearing nga siya nagpayuhot og shabu, ug kasosyo niya si Lim, apan dili kini nila magamit kon wala iapil nga ebidensya sa mga polis. Ang director sa kapolisan sa Central Visayas nga si Chief Supt. Robert Quenery mipasalig usab nga magpadayon sila paghimo og ‘case build up’ batok ni Lim, Espinosa ug kaubanan.

Matud ni Chief Inspector Espenido nga wala siya mabalaka bisan og gibasura sa DOJ ang kaso nga gipasaka sa CIDG batok nila ni Lim, Kerwin ug kaubanan kay ang lain nga kaso nga gipasaka niya ni Kerwin kompleto kaayo sa ebidensya.

Apil si Gobernador Hilario Davide III ang wala makatuo nga ibasura sa DOJ investigators ang kaso batok nila ni Lim ug kaubanan kay nagtuo gyud siya nga lig-on ang mga ebidensya batok kanila.

Matud ni Davide nga kon dunay lig-on nga ebidensya ang kapolisan kinahanglan nga ila gyud kini nga pamatud-an. Si Daanbantayan Mayor Vicente Loot, nga gipasanginlan sab ni Duterte nga nalambigit sa drugas, gusto sab nga imbestigahon siya sa DOJ aron malimpyohan pud niya ang iyang ngalan.

Si Loot miingon nga gi-clear na siya sa CIDG niadtong 2016 sa giingong kalabotan niya sa illegal drug trade, kay matud niya nga siya biktima ra  sa mga tawo nga interesado kaniya ug sa politika.

“Obviously I’m a victim of influence peddling, and I hope makita na nila,” matud ni Loot. - Rowena D. Capistrano ug Camille Pateres (BANAT NEWS)