FB page ni Magpale iyang ipatangtang
CEBU, Philippines — Gusto ni Bise Gobernador Agnes Magpale nga wagtangon ang usa ka Facebook page kalabot kaniya.
Ang “Cebu For Cebuanos” nga Facebook page nga gibutangan pa og hulagway naghisgut kini sa bise gobernador lakip na ang iyang family background ug sa mga nahimo isip opisyal sa gobiyerno.
Usa sa mga nag-una nga post sa maong page nag-ulohan og “Who is AGNES MAGPALE?” diin gisaysay niini ang family background ug nahimong kalampusan sa ginikanan sa bise gobernador.
Ang maong post aduna nay 500 reactions ug 21 ka shares sa Facebook.
Sa usa sa mga post sa maong page niadtong Marso 11 giulohan kini og “FACTS AND TRIVIA” diin gisaysay ang giingong wala pa mahibaw-i sa uban kalabot sa bise gobernador.
Tipik sa post mao ang “Do you know that among top government officers, only Vice-Governor Agnes Magpale was able to set foot and meet personally the people in all 1,000 barangays province-wide.”
“Do you know that she personally drafts her own public speeches,” dugang pa sa maong post nga nakaangkon na og kapin 200 ka reactions ug 14 ka shares sa Facebook.
Si Magpale nagkanayon nga wala siya masayud kun kinsa ang nagpaluyo sa maong Facebook page ug gusto kini niya ipatangtang.
“I’m embarrassed, nauwaw gyud ko. I sincerely appeal to whoever made that, nga tangtanga na intawon na,” matud ni Magpale
“Dili man ko type nga mag-ingon ana sa akong mga nahimo,” dugang sa bise gobernador kinsa nagkanayon nga wala siya kaila sa nagpaluyo niini apan nagduda siya nga taga Kapitolyo ra sab ang nigama niini.
Gikabalak-an sa bise gobernador nga posibleng ang interpretasyon sa uban nga modagan siya sa umaabot nga election, butang nga gitataw ni Magpale nga dili na siya gusto modagan pa.
Matud ni Magpale nga nananghid na siya nga dili na siya gusto magpapili sa sunod nga piniliay tungod kay tiguwang na siya.
Apan matud sa bise gobernador nga sa dihang nananghid na siya ug nipahibalo sa gobernador, wala siya tugti.
Ang maong Facebook page nakaangkon na karon og 163 likes ug 165 followers sa pagsuwat sa balita. (BANAT NEWS)
- Latest
