Mga armas gisurender ngadto sa polis
CEBU, Philippines — Pito ka armas ang gisurender ni Kapitan Ditas Durano, sa Barangay Tabok Kamalig Bato, Danao City ngadto sa kapolisan niadtong Domingo sa hapon.
Si Senior Police Officer 2 Rene Camargo mibutyag nga ang maong mga armas giingong gisurender usab sa usa ka concern citizen ngadto kang Durano.
Ang mga armas nga gi-turnover gilangkuban sa .22 caliber magnum nga adunay markings ug walay markings, .38 caliber revolver ug usa ka frontier 5.6 millemiter nga adunay unom ka buhing bala.
Dugang ni Camargo nga usa ka maayong development ang pagsurender sa maong mga armas ilabi na hugot ang ilang kampaniya sa loose firearms.
Awhag ni Camargo sa mga tawo nga naghupot og mga armas nga walay lisensiya nga isurender kini ngadto sa kapolisan o sa ilang mga opisyal sa barangay aron dili magtingkagol sa prisohan kong madakpan. (BANAT NEWS)
- Latest
