Kapolisan gipahimangnoan batok init
CEBU, Philippines — Nunot sa grabeng kainit sa panahon, ang kapolisan nga anaa sa kadalanan ang gipahimangnoan nga magmatngon kanunay.
Hinoon kagahapon nasinati ang uwan-uwan nga nakapabugnaw sa panahon sukwahi sa natala nga kainit sa PAGASA sa niaging adlaw nga niabot sa 31.5 degrees Celsius apan adunay 37 degrees Celsius nga heat index o ang kainiton nga mabatyagan sa tawo.
Ang kapolisan nga duty sa kadalanan ug mga strategic areas ang gipahinumduman nga dili magpalabi og buwad sa init.
Matud ni Supt. Emelie Santos, deputy chief for operations sa Cebu City Police Office, nga mas maayong adunay dalang tubig ug moinom og bitamina ang kapolisan.
Sumala pa ni Santos nga taliwala sa kainit sa panahon, dili sab dugangan sa kainit sa ulo aron kalikayan ang mga problema.
Samtang sayo sa buntag niadtong Sabado nagpahigayon og Bike for a Cause subay sa kasaulogan sa Fire Prevention Month diin dili mominus usa ka gatos ka sakop sa Bureau of Fire Prevention nga aktibo pa ug niretiro na ang niapil. Nihimo sila sa pagtuyok sa mga major roads sa Dakbayan sa Sugbo aron pagpaabot ngadto sa katawhan nga kinahanglang magmatngon kanunay aron malikayan ang sunog.
Matud ni Senior Supt. Samuel Tadeo, BFP-7 director, nga naghatag sila og mga leaflets aron makita sa katawhan ang angay ug dili angay buhaton aron malikayan ang sunog.
Nagpahigayon sila og Bike for a Cause aron sa pagpalagsik sa panglawas sa iyang mga tawo pinaagi sa pagpasingot gamit ang biseklita. (BANAT NEWS)
- Latest