24/7 public library gihangop
Hamugaway ang pagtuon sa mga tinun-an sulod sa Dr. Jose Rizal Public Library sa Siyudad sa Sugbo diin gihangop sa kadaghanan ang pagbukas niini 24-oras matag adlaw ug dili na makagasto ang mga tinun-an nga adto magtuon sa mga coffee shops ug fast food outlets.—Kristine Joyce W. Campaña
CEBU, Philippines — Daghan ang nihangop ug nakadayeg sa gihimo ni Cebu City Mayor Tomas Osmeña sa pag-abli sa Dr. Jose Rizal Public Library nga 24/7 aron mahimong study area sa mga tinun-an.
Ang paggamit sa public library naumol human usa ka tinun-an ang nikomentaryo sa post sa mayor sa Facebook nga kung mahimo abli ang public library 24/7 aron silang mga tinun-an dunay lugar diin makatuon gyud sila og maayo ug minus ang gasto.
Nakig-alayon na sab ang siyudad og telecommunication company aron dunay wi-fi ang public library.
Kun makita sa mayor nga maayo kini og resulta, nagplano siya nga mangita og laing lugar aron himoon gihapon nga study area sama sa city condominium ug uban pa.
Kuhaon sab sa siyudad ang serbisyo sa Barangay Intelligence Network (BIN) aron maoy mobantay sa seguridad sa public library.
Niadtong niaging adlaw nagtagbo si Osmeña ug si Mitch Roldan, ang tinun-an nga nihangyo sa mayor nga gamiton ang public library 24/7.
Samtang sila si Konsehal Jocelyn Pesquera, Association of Barangay Councils (ABC) president ug Tisa Barangay Kapitan Phillip Zafra ug Konsehal Raymond Garcia nihangop sa lakang ni Osmeña.
“That’s a very good move on the part of the Mayor nindot kaayo as a way of support sa atong mga estudyante aron mo-graduate gyud sila,” matud ni Zafra.
Si Garcia niingon nga importante gyud ang lugar diin mahimong makatuon ang mga tinun-an.
“I agree, I am very happy that the Mayor did that, for me it is something that is very laudable kay ako niagi baya ko’g estudyante and not only that when I was a law school student diha gyud ko naka-realize unsa ka importante ang place to study,” asoy ni Garcia.
Nanghinaut si Pesquera nga hatagan sab og pagtagad ni Osmeña ang seguridad sa tibuok siyudad aron ang mga tinun-an nga mogawas sa public library ilabi na sa kadlawon luwas nga maglakaw sa kadalanan. (BANAT NEWS)
- Latest
