Polis sa Carbon nasikop tungod sa drugas

CEBU, Philippines — Usa ka polis sa Cebu City nga nadestino sa Carbon Police Station ang gidakop sa mga sakop sa Drug Enforcement Unit sa Mabolo Police Station human kini gitumbok nga tinubdan sa drugas diha sa Sitio Panagdait, Barangay Kasambagan, Dakbayan sa Sugbo kagahapon sa kaadlawon.

Ang gidakop giila nga si PO1 Jayrome Solano, lumad nga taga Iligan City ug kasamtangang nagpuyo sa barangay Kasambagan. Giapil sab ang giingong uyab niini nga giila nga si Maria Ester Reponte, 23, taga Dakbayan sa Mandaue.

Sigun pa sa hepe sa Mabolo Police Station nga si Chief Inspector Clark Arriola nga niadtong alas-12 sa kaadlawon sa susamang adlaw nasakpan sa ilang beat patrol ang usa ka grupo nga nanuyop.

Didto giingong nakaplagan ang usa ka reflectorized vest sa polis hinungdan nga ila kining gisukit-sukit ug nitug-an ang mga dinakpan nga iya kadto ni PO1 Solano ug siya ang tinubdan sa ilang drugas hinungdan nga gilusad ang operasyon.

Sa gihimong follow-up operation sa kapolisan sa Mabolo inabagan sa Carbon Police Station natultolan si Solano kauban si Reponte nga giingong naaktohang nanuyop.

Nakuha gikan sa duha ang usa ka medium nga pakete ug usa ka gamay nga pakete nga may sud nga gidudahang shabu lakip na ang pipila ka mga drug paraphernalia. Tungod sa nahitabo, giparelibohan ni Police Regional Office-7 Regional Director Chief Supt. Robert Quenery ang hepe sa Carbon Police Station nga si Police Chief Inspector Jacinto Mandal  kay nagkuwang kini pagmonitor sa iyang mga sakop.

“That is part of command responsibility isip usa ka amahan. Mao nay mga consequence nato,” maoy komento ni Mandal, apan siya miangkon nga wala siya makadungog nga nalambigit sa drugas si Solano, karon pa.

Si Arriola sa iyang bahin mipadayag nga ang pagkadakop sa maong polis nagpakita lang nga walay gipili ang kapolisan sa pagpakigbatok sa drogas ug parte kini sa internal cleansing sa kapolisan.

Ang pagkasikop kang Solano nahitabo tungod sa operasyon diha sa Sitio Cabantan, Barangay Luz diin nadakpan silang Venessa Eboa Larrobis, 25, Orlando Sychiangco Ong, 37, ug Allaine James Ruiz Alcaraz, 27, nga nakuhaan og mga pinaketeng shabu ug drug paraphernalia ug ang reflectorized vest nga aduna’y marka nga “PULIS” nga iya ni Solano. - Gabriel Bonjoc, Romeo  T. Limpangog ug Leanne Mae D. Binag (BANAT NEWS)