Nieskapo nga piniriso gisugo

CEBU, Philippines — Gisugo diay sa durugista ang piniriso nga nisuway sa pag-ikyas human sa pagtambong og hearing sa Palace of Justice sulod sa compound sa Talisay City Hall sa niaging semana.

Sa imbestigasyon sa Cebu City Jail nga pinangulohan sa warden nga si Supt. Renante Rubio nasuta nga si Cresencio Nadera Jr. gisugo sa durugista nga taga Barangay Tangke aron aduna siya’y patyon nga polis asset sa kantidad nga P40 mil.

Gani ang una nilang sabot nga rescue-hon si Nadera pinaagi sa pag-ambush sa mga escorts niini.

Apan si Nadera ang nibalibad ug nihimo og diskarte aron siya makaipsot sa mga jail guards nga escorts kaniya.

Gumikan sa kahumok sa iyang kamot nakalugnot siya sa pusas dayon dagan palayo.

Apan nasikop ra sab pagbalik si Nadera human sila si PO3 Rustom Elorde sa Lungsod sa Minglanilla ug si SPO4 Frederick Larrobis ang dali nga nakadagan ug nisikop kaniya.

Ang mga pangan nga nagsugo ni Nadera ang gihatag na ngadto sa Criminal Investigation and Detection Group (CIDG-7).

Si Nadera ang napaubos sa bartolina gumikan sa iyang gibuhat samtang ang jail guards nga nag-escort kaniya ang gipaubos sa imbestigasyon.

Ang duha ka polis nga nakadakop pagbalik kang Nadera ang gipasidunggan sab sa ilang nabuhat. (BANAT NEWS)