Basura ipabahig na sugod Marso 1

CEBU, Philippines — Sugod karong Marso 1, subling ipatuman sa Cebu City Environment and Natural Resources Office (CCENRO) ang ‘No Segregation, No Collection’ policy sa mga basura sa siyudad.

Sumala pa sa pangulo sa CCENRO Nida Cabrera hapit na mahuman ang orientation sa urban barangays sa North District ug isunod na ang mga barangay sa South District. Gipahibawo na sab sa CCENRO ang mga barangay kapitan sa collection scheme sa siyudad apil na niini kang Association of Barangay Council (ABC) President ug Tisa Barangay Captain Phillip Zafra.

Ang mga Barangay Environmental Officers (BEO) gitahasan nga moisyu og citation ticket sa mga indibidwal nga dili mo-segregate sa ilang mga basura. Sa unang paglapas, P500 ang multa o community service, sa ikaduhang higayon P1,000 ug community service ug sa third offense P3,000 ug community service ang silot. Kinahanglang bahigon ang mga basura sama sa biodegradable, non-biodegradable, residual ug special waste.

Ipatuman kini sa siyudad aron makatabang pagpakunhod sa hauling expense ug pagpalambo sa garbage collection sa dakbayan. (BANAT NEWS)