Kapolisan sa Carcar City tukoran og bag-ong police station

CEBU, Philippines — Ang kapolisan sa dakbayan sa Carcar makaangkon na unya og bag-ong police station building nga mokantidad og P35 milyones nga ipatukod kanila adto sa Barangay Poblacion 3.

Matud ni Mayor Nicepuro Apura nga papaspasan niya ang pagpahigayon og bidding aron kasugdan dayon ang pagtukod sa proyekto nga gusto niyang mahuman ang unang andana atol sa ilang Charter Day karong Hulyo 7.

Ang bag-ong police station tukoron sulod sa 500 metros kwadrado nga luna nga luag na unya alang sa kapin sa 50 ka polis nga nadestino sa maong lungsod.

Gipasabot ni Apura nga sanglit aduna pa lang sila’y P21 milyones nga budget para sa maong proyekto, ang pagtukod sa bag-ong police station himoon nila sa duha ka hugna.

Ang hepe sa kapolisan sa Carcar nga si Superintendent Gregorio Galsim nalipay kaayo nga ang mga opisyal sa siyudad nagpakabana kanila. Ang bag-ong police station mahimutang dili layo sa karaang police station, nga himoon na lang unya nga sub-station.