LTFRB naglisud pagpangita’g luna

CEBU, Philippines — Ang Land Transportation Franchising and Regulatory Board (LTFRB) nagtagana na og P70 milyones aron ipalit og luna nga katukoran sa ilang regional office, apan wala gyu’y nakit-an nga luna.

Kini maoy rason nga ang LTFRB-7 regional office padayong nag-abang og P60 mil ang buwan sa pag-ukopar nila sa gamay ra nga building diha sa North Reclamation Area sa dakbayan sa Sugbo.

Si LTFRB-7 director Ahmed Cuizon mipasabot nga dunay mga luna nga ilang nagustohan apan may problemang teknikal, sama sa kakuwang og dukomento ug ang uban may pending nga kaso mao nga dili pa kini ikabaligya.

Gani si Cuizon mipadala na og hangyo kang Mayor Tomas Osmeña nga pagamiton sila og luna diha sa South Road Properties (SRP) nga kabutangan sa mga sakyanan nga ilang madakpan.

Matud ni Cuizon nga ang giukopahan nila nga opisina orihinal nga gidesinyo isip bodega, ug ila na lang gihimoan og paagi nga magamit isip opisina. Si Cuizon miingon nga kanunay usab kini nga lunopan kon mag-uwan.

Ang property nga gipangita nila ni Cuizon kinahanglang ang gidak-on labing menos 2,000 metros kwadrados ug nia sa siyudad sa Sugbo mahimutang kay sagad sa ilang mga kliyente ania sa siyudad ug mas sayon alang kanila.

Dugang ni Cuizon nga kon makakita na sila, sugdan dayon nila ang pagtukod sa tulo ka andana nga opisina sa LTFRB ug humanon kini sulod sa 10 ka buwan. (BANAT NEWS)