SHFC mopatukod og housing project sa Talisay
CEBU, Philippines — Napilian ang dakbayan sa Talisay nga malakip sa mga benepisyaryo sa housing project nga ibubo sa Social Housing Finance Corporation (SHFC) aron makatabang ngadto sa mga kabus nga wala pa gyu’y desenteng pinuy-anan.
Ang presidente sa SHFC nga si Atty. Arnulfo Cabling nibisita ni Talisay City Mayor Eduardo Gullas sa miaging semana ug ilang gihisgutan ang housing programs nga ipatuman sa siyudad.
Matud ni Cabling nga gusto silang motabang sa mga Talisaynon nga wala pa’y desente nga pinuy-anan, ilabi na karon nga naggahin gyud sila og P1 bilyon alang sa tibuok Visayas.
Sa ilang pagsuroy sa siyudad, ilang nakita nga andam man ang Talisay, busa usa kini sa mga benepisyaryo sa proyekto. Gusto hinoon sa SHFC nga ipahaum ang housing project sa sitwasyon sa dakbayan.
Hinoon para kang Cabling nga kun gusto sila nga motukod og high- rise building mas labing maayo aron daghan ang makapahimus, ingon man dili usik sa lugar.
Ang kasamtangang rehistrado sa Talisay City Social Housing Board niabot sa 19,762 base sa talaan ni Rosalie Autor, ang pangulo sa maong opisina.
Si mayor Gullas sa iyang bahin nagpasalamat ni Cabling ug naglaom nga kahatagan dayon og katumanan ang plano. (BANAT NEWS)
- Latest
