Hugawan nga mga tinder dili na pabaligyaon

CEBU, Philippines — Ang city engineer sa Talisay City miawhag sa katawhan nga isulod gyud sa ilang alimpatakan nga ang paglabay og tarung sa mga basura makatampo nga malikay sa baha ang ilang lugar.

Si Engr. Ariel Araw-Araw nipadayag niini tungod kay ang dapit sa Colis Street nga kilid ra sa merkado sa Tabunok kanunay gyud nga makasinati og paglunop sa wala pa kini gi-ayo.

Matud ni Araw-Araw nga sa pagbukas sa bag-ong merkado hayan dili na masinati ang baha sa kilid sa merkado.

Hinoon, giawhag niya ang katawhan nga motuman gayud sa tukmang pamaagi sa paglabay og basura kay, kon dili, makatampo kini sa paglunop na usab sa maong dapit.

Si Araw-Araw miingon nga adunay ubang tindera nga magpataka lang og labay sa ilang mga basura, labi na gyud diha sa kanal, mao na nga mobara ang drainage system.

Si Atty. Rudelyn Navarro, city administrator sa Talisay, nibutyag nga usa kini sa ilang hatagan og pagtagad kon mosugod na sa pagpaninda ang mga tindera kay estrikto na nilang ipatuman ang mga balaod.

Matud ni Navarro nga gusto nilang limpyo ang merkado ug mahimo lang kini kon responsible ang mga manindahay. Kon adunay masakpan nga magpataka lang paglabay sa mga sagbot, himoon kining basehanan nga dili na i-renew ang ilang pag-ukopar og stalls sa merkado sa Tabunok.

Ang dakbayan sa Talisay adunay ordinansa nga mogamit na lang og bulsita, apan mahimo usab nga ang mga pumapalit maoy magdala og ilang bag inig pangumpra nila sa merkado. (BANAT NEWS)