P230 milyon para hospital sa bogo
Si Senador Risa Hontiveros nibuhos og minasa nga semento atol sa ground breaking ceremony sa bag-ong building sa provincial hospital sa Dakbayan sa Bogo nga gastuhan sa nasudnong kagamhanan. Kristine Joyce W. Campaña
CEBU, Philippines — Sugdan na ang pagpadaku sa Severo Verallo Memorial District Hospital sa Dakbayan sa Bogo isip provincial hospital.
Gihimo kagahapon ang ground breaking ceremony sa upat ka bag-ong building sa maong tambalanan diin ang phase 1 gipaabot nga mahuman karong Disyembre.
Si Senador Risa Hontiveros kinsa nitambong sa seremonya nagkanayon nga si Bokal Horacio Franco ang niduol kanilang mga senador aron mangayo og pundo sa pagpadaku sa tambalanan.
Gani nagpasalamat si Hontiveros sa iyang kaubanan sama nilang Senador Bam Aquino, Loren Legarda, Sonny Angara ug sa Department of Health ug Department of Public Works and Highways sa pagtabang sa iyang gihulagway nga ambisyoso nga proyekto.
Ang maong hospital usa sa gitinguha sa Kapitolyo nga mapalambo.
Si Dr. Rene Catan, pangulo sa Provincial Health Office, nagkanayon nga pinaagi sa upgrade sa mga provincial ug district hospitals dili na kinahanglan dad-on sa Dakbayan sa Sugbo ang mga pasyente gikan sa probinsiya.
Si Bise Gobernador Agnes Magpale, Franco ug ubang opisyal sa Kapitolyo maoy nangulo sa ground breaking ceremony kagahapon sa Dakbayan sa Bogo. (BANAT NEWS)
- Latest
