60 Tanod way allowance
Kini human ang pangulo sa Cebu City Office for Substance Abuse Prevention Garry Lao mirekomendar sa suspension sa P4,000 nga monthly allowance sa mga tanod sa tulo ka barangay tungod kay wala makasunod sa direktiba. File
CEBU, Philippines — Temporaryong i-suspenso sa kagamhanan sa siyudad sa Sugbo ang honorarium sa gibanabanang 60 ka mga barangay tanod sa Carreta, Ermita ug Lahug kay pakyas ang mga nahisgutang barangay pagsumitir sa ilang accomplishment report.
Kini human ang pangulo sa Cebu City Office for Substance Abuse Prevention Garry Lao mirekomendar sa suspension sa P4,000 nga monthly allowance sa mga tanod sa tulo ka barangay tungod kay wala makasunod sa direktiba.
Sa suwat nga dunay petsa Enero 11, 2018 nga gi-address kang Mayor Tomas Osmeña nakalatid didto gikan sa Disyembre 5 hangtud na sa 27 sa miaging tuig ang tulo ka barangay pakyas sa pagduso og accomplishment report sa mga barangay tanod.
"In this regards, as authorized by your office, may I recommend for the temporary suspension of the city government's allowance against the non-compliant tanods for the month of December," tipik sa suwat.
Kahinumdoman nga niadtong buwan sa Nobiyembre sa miaging tuig si Osmeña mipagawas og memorandum nagmando sa tanang barangay pagduso niini kada petsa 5 ug 25 kada buwan inay ang weekly submission.
Sa miaging tuig, si Lao gitugutan sa mayor pag-evaluate sa performance sa mga barangay tanod isip rekisitos sa dili pa mo-release ang siyudad sa monthly allowance.
Gihimo kini sa mayor human masayod nga dunay mga barangay tanod nga wala mohimo sa ilahang trabaho.
Sa press conference sa mayor niadtong adlaw'ng Biyernes, Enero 12 kini miingon tan-awon niya ang rekomendasyon ni Lao apan kini mitataw andam niya pirmahan ang suwat tungod kay ang maong mga barangay wala motuman sa kamanduan.
Ang suspension libkason kun makatuman na sila sa pagduso sa accomplishment report sa mga tanod.
Sa iyang bahin, si Ermita Barangay Captain Mark Miral miingon nga nakasugat sila og problema sa paghimo og monthly report maong nadelatar kini. “Actually naa tay problema gamay sa documents so ato gi-pass gahapon (Friday). If that is his decision, I will respect it," sigon ni Miral. (BANAT NEWS)
- Latest
