Mandaue ug Lapu-Lapu manirado og mga dalan

CEBU, Philippines — Ang naandan nga tinuig nga kalihokan sa traslacion sa Imahen sa Señor Sto. Niño mao nga manukad kini sa Basilica Minore del Santo Niño sa Biyernes sa buntag nga kauban sa Imahen sa Birhen sa Guadalupe  ug dad-on kini sa National Shrine of Saint Joseph sa Dakbayan sa Mandaue.

Nunot sa pagpasiugda sa maong kalihokan sa maong adlaw ang buhatan sa Traffic Enforcement Agency of Mandaue (TEAM) nga gipangulohan ni Glenn Antigua sayo pa sa buntag sa Biyernes, Enero 19  niining tuiga  mopatuman og mga kausaban sa agianan sa mga sakyanan.

Gawas sa mga kausaban sa traslacion hawanan ang mga dalan sa M.C. Briones sa Barangay Subangdako ug dalan A. del Rosario paingon sa Barangay Centro sa Dakbayan sa Mandaue.  

Sa paghidangat sa duha  ka mga imahen sa sulod sa National Shrine of Saint Joseph may arrival mass nga buhaton ug bilaran tibuok gabii alang sa himoong motorkada padung sa Lapu-Lapu pagka-Enero 20 sa ala-1:30 sa kaadlawon.

Dad-on ang mga imahe sa Lapu-Lapu padung sa simbahan sa Birhen sa Regla.

Si Mario Napuli, pangulo sa City Traffic Management System (CTMS) miingon nga siradohan nila ang  G.Y. Dela Serna gikan sa eskina sa Mantawi road ug lahos na ngadto sa eskina sa  P. Rodriguez St  sa Barangay Looc, Dakbayan sa Lapu-Lapu. Sirado usab ang 1st Street sa Barangay  Canjulao junction A.Tumulak St. corner, S. Osmeña St. nga manukad sa eskina sa Ceres road paingon ngadto sa dalan  G.Y. Dela Serna.

Adunay himuong rerouting sa mga pasaheroan  samtang ang mga pribadong sakyanan gitambagan sa pagsubay sa mga alternatibong dalan sa ilang pagpadulong sa ilang destinasyon gikan o padulong sa Dakbayan sa Mandaue o Dakbayan sa Sugbo. (BANAT NEWS)