Nagkupot pa og bibliya

CEBU, Philippines — Naggunit pa og Bibliya dihang nadiskubrehan ang patay’ng lawas sa  9- anyos nga batang lalaki nga naapil sa pagkasunog sa ilang panimalay alas 7 pasado ang takna sa hapon sa miaging Domingo sa Purok Ube, Barangay Gun-ob, Dakbayan sa Lapu-Lapu.

Si Fire Officer 3 Ruffred Amores nga maoy imbestigador sa Lapu-Lapu  City Fire District Office (LLCFO) miila sa biktima nga mao si James Sorbella nga nagpuyo sa maong dapit.

Duha ka panimalay ang nasunog nga pulos lamang ginama sa light materials apan usa niini ang hingpit  gayod nga naugdaw.

Samtang si Senior Fire Officer 1 Hadji Salisid, ang arson investigator sa maong siyudad miingon nga ang ulo ni Sorbella nag ung-ong na sa door jam ug sa pultahan nga nikang-a na apan nakandado.

“The boy’s body was already charred when we found him. Iyahang ulo naka-ung-ong  sa purtahan, na-suffocate na siya (didto). Makita nimo nga naninguha sad siya og gawas padung sa hawan sa ilahang balay,” matud pang Samonte.

Nakagawas ang mga igsuon sa bata nga nag-edad og 10 anyos ug 5 anyos samtang wala  ang ilang apohan nga si Edith ug pag-umangkong si Jocelyn kay nitambong sa ilang simbahan.

Ang balay nga bungalow type ginama lang sa light materials ug 50 metro kwadrado kalapdon. Wala pa matino ang hinungdan sa sunog apan gituohan nga electrical misuse o short circuit kini.

Base sa imbestigasyon, natulog sa lawak ang biktima samtang nagtan-aw og TV ang mga igsuon niini.

Matud pa nga nagsugod ang   kalayo sa lawak sa uyoan sa namatay kinsa wala diha sa pagkahitabo.

Ang mga bombero nga nakakita gikan sa ilang buhatan sa pagdako sa kalayo daling miresponde.

“Nakita namo visible ang fire pag 3:30 sa hapon,” mao to amo girespondehan,” matud ni Salisid.  Nakontrolar dayon kini sud lang sa walo ka minutos.

Tungod sa nahitabo sa bata, gipahinumdoman ni Samonte ang publiko nga dili biyaan ang ilang mga anak o mga bata alang sa ilang kaluwasan.

 “Dapat ang mga adults mo-monitor sa ilaha ug dili nato dapat isalig sa ilaha. Mas maayo kung naa gyud sila’y kauban sa balay or guardian,” matud pang Samonte. Ug report gikan sa The Freeman (BANAT NEWS)