Davide mibisita sa mga biktima ni Agaton

CEBU, Philippines — Gibisita kagahapon ni Gobernador Hilario Davide, III ang pamilya sa duha ka nangamatay sa lungsod sa Malabuyoc atol sa panguso-kuso sa bagyong  Agaton didto sa habagatang bahin sa lalawigan sa Sugbo.

Ang pamilya ni Flora Matas Basadre ug ni Ritchie Pimentel nga taga Barangay Sto. Niño Malabuyoc matag usa kanila nakadawat og usa ka sakong bugas, cartoon sa sardinas ug food packs gikan sa Kapitolyo.

Matud ni Julius Regner, tigpamaba sa Provincial Disaster Risk Reduction and Management Office (PDRRMO) nga bisan wala gikonsiderar sa PDRRMO nga “typhoon related” ang pagkamatay ni Pimentel apil gihapon kini sa gihatagan sa Kapitolyo og hinabang.

Ang Kapitolyo mihatag usab og burial assistance ngadto sa pamilya sa nangamatay.

Sa iyang bahin, si Baltazar Tribunalo Jr. pangulo sa PDRRMO nagkanayon nga aduna sila’y giporma nga team pag-assess sa danyos sa bagyong Agaton didto sa habagatang bahin sa Sugbo.

Duha ka dakbayan ug siyam ka lungsod ang naapektohan sa bagyong Agaton nga gilangkuban sa mga lungsod sa Ginatilan, Malabuyoc, Dumanjug, Sibonga, Barili, Alegria, Boljoon, Argao, Alcoy, mga dakbayan sa Toledo ug Carcar.

Matud ni Tribunalo nga maghuwat sila sa assessment sa team sa PDRRMO sa gilapdon sa danyos karong semana aron masuta kung angayan ba nga modeklarar ang probinsiya og state of calamity sa nahisgutang mga lugar. (BANAT NEWS)