Oplan Isnabero gipatuman

CEBU, Philippines — Ang buhatan sa Land Transportation Franchising and Regulatory Board (LTRB)-7 ang hugtanong mopatuman sa Oplan Isnabero niining panahon sa kapaskohan nga giingong maoy sagad isiaw sa mga badlungong drayber sa taksi.

Si LTFRB -7 Director Ahmed Cuizon miingon nga ilang gibantayan karon kining mga drayber nga mobalibad og pasahero, sobrang mangayo og plitehan, dili mogamit sa ilang metrohan, mga kolurom ug overloading.

Gitataw ni Cuizon nga nakiglambigit niining mga panahona ang ilang buhatan sa mga nagdumala sa mga terminal dinhi  diin usab ilang gipahimutang ang ilang mga tarpaulin, streamers sa mga taxi stands  ug public utility terminals.

Sa tarpaulins gibutang ang  hotline sa LTFRB-7 nga 032- 2316221 aron isumbong ang mga badlungong drayber pinaagi sa pag-report sa plaka, lugar, oras ug kon mahimo hasta pangalan sa drayber.

Si Carlos Patigdas, 44, taga  Barangay Jagobiao, Dakbayan sa Mandaue nalipay niini apan gusto siyang apilon sa pagdakop kining mga pasaheroan sa Danao nga di magpasakay og pasahero nga manaug sa Barangay Basak hangtud sa Jagobiao.

Samtang ang uban nga mga drayber  nga nagbiyahe sa Consolacion gikan sa SM sa  Dakbayan sa Sugbo  mag-trip cutting kay kutob ra sila sa Highway Seno kay mobalik dayon sa Dakbayan sa Sugbo. (BANAT NEWS)