Nagluklok og armas sikop
CEBU, Philippines — Usa ka lalake nga nagdala og armas ug gituohang tulisan ang nasikop sa miaging adlaw sa kapolisan sa Presinto 3 sa Lapu-Lapu City Police Office (LLCPO) diha sa Purok Kulo, Barangay Canjulao, dakbayan sa Lapu-Lapu.
Ang kapolisan miawhag sa publiko sa pagbisita diha sa ilang buhatan aron pag-ila sa ilang nadakpan kong nabiktima ba sila niini.
Si Police Officer 2 Adriane Yontig sa Presinto 3 sa LLCPO miila sa dinakpan nga si Kevin Igot Dungog, 22-anyos nga nagpuyo sa maong dapit kinsa nasakmitan og kalibre .38 nga revolver nga dunay mga buhing bala.
Matud ni Yontig nga pasado alas 3:00 sa kadlawon sa milabay’ng adlaw nakadawat sila og tawag sa telepono labot sa nasigpatan nga lalake nga nagluklok og armas diin gikatahapan kini nga responsable sa mga insidente sa tulis ug kawat diha sa nahisgutang dapit.
Nunot niini, si Yontig miawhag sa mga biktima sa tulis o pagpanglungkab aron mahiusa ang ilang pag-andam sa ipasaka nga kaso batok kang Dungog. (BANAT NEWS)
- Latest