Duha ka hubog gibalhog sa stockade
CEBU, Philippines — Duha ka lalake kinsa giingong mga hubog gipasanginlang nanginsulto sa kapitan ug tanod ang nagtingkagol diha sa detention cell sa Barangay Punta Engaño, dakbayan sa Lapu-Lapu sa miaging gabii.
Si Police Officer 3 Aaron Devera sa presinto 2 sa Lapu-Lapu Police Station miila sa mga suspetsado nga sila si Ariel Binabag Kinbiao ug Benjie Yayon Verdida, parehong hingkod ang panuigon ug mga residente sa Sitio Lupa, Barangay Punta Engaño sa nahisgutang siyudad.
Matud ni Devera nga ang mga tanod mitubag sa insidente sa kagubot diin ang grupo sa mga menor de edad lakip na ang duha ka suspetsado ang nalambigit niini.
Giingong si Kinbiao ug Verdida nakabaton og mga bun-og sa lawas human bunal-bunali og botelya sa ilimnong makahubog. Ang mga nalambigit nga grupo gidala sa mga tanod diha sa ilang barangay hall aron i-blotter ang nahisgutang insidente.
Apan giingong samtang nagsuwat sa blotter ang tanod si Kinbiao nagpunay og pamugos nga ihatud siya ngadto sa pribadong tambalanan sa dakbayan sa Mandaue.
Giingong wala hatagi og pagtagad sa mga tanod ang hangyo ni Kinbiao hinungdan nga napungot kini nagyawyaw ug miawhag kang Kapitan Lourses Ibag nga pabalikon sa pagtungha ug ipaubos sa seminar ang mga tanod.
Dugang ni Devera nga si Kinbiao ug Verdida mianha sa ilang buhatan aron moreklamo batok sa kapitan apan ang duha gipaubos sa liquor test sa mga polis ug nasuta nga pareho kining nakainom hinungdan nga gibalhog diha sa detention cell. (BANAT NEWS)
- Latest