Abi og adik, polis diay

CEBU, Philippines — Usa ka gipasanginlang drug pusher ang gidakop  sa  mga polis human nga ang polis nga nagpatrolya sa pagpatuman sa curfew  nasaypan niini nga customer ug gipanghagad ang iyang baligyang drugas.

Ang maong insidente nahitabo  sa Zone  Lato, Barangay Calawisan,  Dakbayan sa Lapu-Lapu nga niresulta sa pagkasikop kang Niño Potot  Bermae, 37  anyos, minyo nga nagpuyo sa maong dapit.

Matud ni Senior Inspector  Crescencio Cleopas III nga maoy hepe sa Presinto 3  sa LLCPO nagpatrolya ang iyang mga sakop pinangulohan ni PO1 Ronaldo Nagpikit alang sa pagpatuman sa curfew batok sa mga kabataan diha sa maong dapit.

Gikatahong naagian niini ang suspek ug sa pag-agi niya sa tungod sa suspek miduol ang naulahi ug gihagad ang gidala niining shabu nga iyang baligya.

Dihadiha giposasan ang suspek ug gibalhog sa prisohan. Nakuha gikan  kaniya ang upat ka gagmay nga paketeng shabu nga nagsilbing ebidensiya sa kaso nga gipasaka batok niini. - /IBM) (BANAT NEWS)