Mga parkingan nagpaburot sa presyo
Sa maong ordinansa, ang syudad nagmando sa mga establisamento nga mag-impose og P20 nga parking fee sa unang tulo ka oras ug P5 kada mosunod nga oras. Philstar.com/File
CEBU, Philippines — Daghang mga motorista ug mga tag-iya og mga sakyanan ang mireklamo sa kamahal sa bayranan sa parking sa nagkadaiyang mga establisamento sa Syudad sa Sugbo.
Matud ni Konsehal David Tumulak nga daghan siyang nadawat nga mga tawag ug text messages nga nagreklamo sa mga businesses nga wala misunod sa City Ordinance No. 2089 kun Ordinance Setting Standards for the Operation of Privately-owned Off-street Pay Parking areas sa syudad.
Sa maong ordinansa, ang syudad nagmando sa mga establisamento nga mag-impose og P20 nga parking fee sa unang tulo ka oras ug P5 kada mosunod nga oras.
“Nag-awhag ta sa atong mga establishments sa pagpamenus sa ilahang mga parking fees kay base on the ordinance ang parking fee is only P20 for the first three hours and succeeding hour is P5,” matud ni Tumulak.
Sigon niya nga adunay establisamento nga nag-charge og P50 sa tulo ka oras ug P10 sa mga mosunod nga oras. Duna sab nangolekta og P20 kada oras ug laing establishment ang nangolekta og P30 sa unang tulo ka oras ug P10 sa mosunod nga oras.
Tungod niini, gipahimangnoan ni Tumulak ang mga business establishments sa syudad nga basahon ug sundon ang City Ordinance 2089 aron dili sila mag-atubang og kaso batok sa city government.
Sa laing bahin, ang SM City Cebu nga management nangutana sa syudad kon apil ba sila sa implimentasyon sa Ordinance 2089.
Ang Mall Manager nga si Eng. Van Velez Aberia nangutana kang Konsehal Eugenio Gabuya, miangkon nga sila nag-charge og flat rate nga P25 sa parking area.
“Can SM City Cebu or any establishment charging flat parking rates be exempted from the ordinance? If such exemption is deemed in order, can this be made explicit in an amended resolution?” pangutana ni Aberia.
Matud ni Aberia nga angay nga mohatag og konsiderasyon ang syudad tungod ang mga malls dunay gihimong mga improvements sa ilang facilities ug dili paigo ang P20 sa unang tulo ka oras sa pag-cover sa ilang mga expenses.
Si Gabuya, kinsa chairman sa committee on transportation miingon nga ilaha nang gipasa ang suwat sa SM ngadto sa City Planning and Development Office ug City Legal Office aron matun-an. (BANAT NEWS)
- Latest
