Duha napagan sa rambol napusilan
CEBU, Philippines — Duha ka batan-on ang naangol human napagan sa rambol sa duha ka managribal nga gangs sa dalan F. Martir, Barangay Poblacion, Dakbayan sa Lapu-Lapu alas 11 pasado ang takna sa miaging gabii.
Si Police Officer 3 Joseph Ruel Cutanda sa Homicide Section sa Lapu-Lapu City Police Office (LLCPO) miingon nga ang biktima nga si Raymart Estores Primacio, 19, taga Barangay Gun-ob ug ang kuyog niining 13 anyos nga lalaki.
Matud pa sa kapolisan nga naglakaw padulong na pauli sa ilang panimalay ang duha ug naatlan nga adunay duha ka gangs nga nagrambol.
Si Cutanda miingon nga adunay sakop sa nagsangka nga grupo ang nagpabuto og armas ug nangaigo ang duha. Daling namiya ang mga nagkarambola ug wa nay naabtan ang kapolisan.
Si Primacio nakaangkon og grabeng samad pinusilan sa iyang lawas samtang ang 13- anyos naigo sa iyang bukton ug parehong gidala sa Lapu-Lapu City District Hospital. (IBM) (BANATNEWS)
- Latest