Kaso vs Rama gibasura

CEBU, Philippines — Gibasura sa Office of the Ombudsman ang kasong kriminal nga gipasaka sa usa ka abogado batok ni kanhi mayor Michael Rama kalabot sa paghatag og P20,000 calamity assistance sa mga kawani sa City Hall niadtong 2013.

Matud pa sa resolusyon nga gisuwat ni Graft Investigation and Prosecution Officer IV Millicent Reyes nga walay probable cause ang gipasaka nga kaso ni Atty. Reymelio Delute batok kang Rama.

Si Delute namasangil nga malversation of public funds ang gihimo sa kanhi mayor paghatag og tag P20 mil nga calamity assistance sa 4,200 ka mga kawani sa city hall niadtong naigo sa 7.2 magnitude nga linog ug super typhoon Yolanda ang Kabisay-an niadtong tuig 2013.

Ang pito ka pahina nga resolusyon giaprobahan ni Ombudsman Conchita Carpio Morales niadtong August 23.

Nagpatawag si Rama og press conference kagahapon ug nanghatag og kopya sa resolusyon nga iyang nadawat karong semanaha.

“Damage has been done. I still have to get my lawyer on the next move because we were unfairly treated during that time,” matud ni Rama kinsa miingon nga nasuspenso na ‘nuon siya ug laing opisyales tungod sa desisyon sa Office of the President sa miaging tuig.

Gikiha ni Delute silang Rama, Vice Mayor Edgardo Labella, ug dose ka City councilors tungod niini.

Nasuspenso silang Rama, Labella, ug dose ka opisyales niadtong May 17, 2016 tungod sa administratibang kaso nga gipasaka sab ni Delute batok sa mga opisyales.

Matud sa Ombudsman nga nagamit ra sa saktong pamaagi ang Budget Ordinances 2379 ug 2380 ug wala makalapas si Rama sa pag-implementar sa maong ordinansa.

Gani, matud sa Ombudsman nga wala ra mamili og mga tawong hatagan si Rama kay tanang casual ug regular employees ang nakadawat niini.

Gipamahayag sab sa Ombudsman nga gideklara nga operative ang maong mga budget ordinances sa Department of Budget and Management niadtong 2013.

Sa iyang bahin, si Delute miingon nga dili na siya mopasaka og motion for reconsideration tungod matud pa nga nadawat niya nga dili siya makadaog sa tanang kaso. - /IBM) (BANAT NEWS)