1 toneladang isdang pinabuthan gisakmit

CEBU, Philippines — Dili mominus sa usa ka libo ka kilong tinirohan nga isda ang gisakmit sa Cebu City Bantay Dagat Commission (CCBDC) sayo sa kabuntagon kagahapong adlawa sa Pier 5.

Matud ni CCBDC Executive Director Michael Guerra nga ang lima ka mga boxes nga adunay barracuda (rompi/pangalwan), ubod, ug indong nga mga isda mobalor og P120 mil ang ilang gisakmit.

Apan wala nila masakpi kun kinsa ang tag-iya niini. Ang maong mga pinabuthang isda gisakay sa usa ka roro nga barko gikan sa Zamboanga City. Sigon ni Guerra nga nag-atang ang mga kawani sa CCBDC kauban ang mga fish examiner sa Bureau of Fisheries and Aquatic Resources kay nakadawat sila og tip nga adunay kargang pinabuthang isda ang maong barko. Human nga makompirma sa mga fish examiners sa BFAR nga tinirohang isda ang naa sa mga kahon gikompiskar ug way miangkong tag-iya.

Matud ni Guerra nga pasakaan nila og kasong paglapas sa Section 92 sa Republic Act No. 10654 o Philippine Fisheries Code of 1998 ang tag-iya sa maong mga isda.

Ang mga isda ipanghatag ngadto sa Operation Second Chance, Pari-an Drop in Center, Community Scout, ug lain pang mga charitable institutions. (BANAT NEWS)