Cuizon gidepensahan sa mga opisyal
CEBU, Philippines — Dili motuo ang duha ka dagkong opisyal sa Siyudad sa Sugbo sa pasangil ni Senador Antonio Trillanes IV nga apil si Land Transportation Franchising Regulatory Board-7 Director Ahmed Cuizon sa giingong extortion sa Uber.
Mipabuhagay sa ilang pagsupak silang Mayor Tomas Osmeña ug Bise Mayor Edgardo Labella sa pasangil batok ni Cuizon.
Si Osmeña, kinsa higala ni Cuizon sa dugay na nga panahon miingon nga lisod tuohan ang pamasangil ni Trillanes kay maayo kini sa iyang panerbisyo ug gani wala gyud kini relibohi ug gikuha pa isip officer-in-charge sa Region 8.
Matud sa mayor nga naila si Cuizon dinhi nga estrikto sa iyang panarbaho.
Naduhig si Cuizon sa isyu dihang gihisgotan siya ni Trillanes niadtong Huwebes sa Senate inquiry mahitungod sa P6.4 Bilyones nga illegal drug shipment nga nakasulod sa nasud ug giimbestigar bahin niini ang Bureau of Customs.
Humanang mihimakak si Cuizon sa maong alegasyon diin iyang giingon nga wala siya maapil ug wala moapil sa mga ilegal nga transaksyon sa iyang panrabaho sa gobiyerno.
Si Labella, sa iyang bahin, miingon nga wala na siya masurpresa ni Trillanes kinsa giingong magpataka og estorya bisan og walay ebidensya.
Sigon ni Labella nga kaila siya ni Cuizon ug dili siya makatuo sa pasangil ni Trillanes. - /IBM) (BANAT NEWS)
- Latest
