Pacquiao gilabanan, gidayeg sa iyang mga kaubang senador
CEBU, Philippines – Human gipagawas ang desisyon sa mga hurado sa Pacquiao-Horn fight, diin napildi ang Pambansang Kamao, daling nipadayag sa ilang suporta ang mga kaubanan niining senador ug niingon nga gihikawan sa kadaugan si Sen. Manny Pacquiao.
Sa taho sa philstar.com, nipadayag sa ilang kasagmuyo ang mga senador pinaagi sa ilang mga social media accounts.
Matud pa ni Senador Richard Gordon nga gikawat nila ang kadaugan ni Pacman.
"The whole world is unanimous. Our man won. We are confident he did," dugang pa ni Gordon.
Si Senador JV Ejercito niingon nga ang unanimous decision wala’y bili apan nipadayag kini sa iyang Twitter nga "whatever the result is, no other Filipino in the modern era has given the Philippines so much honor."
Mao sab kini ang nahimong reaksiyon ni Senador Sherwin Gatchalian. "Looking at all the stats, Manny connected twice as more punches compared to Horn. Don't understand how he lost this one," padayag pa ni Gatchalian.
Nipadayag si Pacquiao human gi-anunsiyo ang resulta nga wala siya magdahum nga mapildi apan iyang girespeto ang maong desisyon. "But it's part of the game. I respect that," matud pa sa boksingero nga senador.
Samtang si Senador Sonny Angara, nidayeg kang Pacman gumikan sa iyang nindot nga duwa ug niingon nga "win or lose, Filipinos will always be proud of you, of what you have done for the sports and for the whole country."
Si Sen. Grace Poe, niingon nga ang kapildihan wala makapamenos ni Pacquaio.
"Ikaw pa rin ang kampeon sa puso ng mga Pilipino!," sigon sa senadora sa iyang Twitter.
Nipadayag sab sa iyang suporta si Sen. Nancy Binay diin matud niini nga si Pacman maoy sumbanan sa mga batan-ong boksingero sama ni Horn.
"Manny showed us that we remain graceful in defeat, never losing hope, and striving to get back up on our feet against adversity," dugang sa senadora.
Ang palasyo sa iyang bahin nipadayag nga bisan paman sa kapildihan sa welterweight title, nagpabilin nga si Pacquiao mao gihapon ang People's Champ. (BANAT NEWS)
- Latest
