Guardo nanghatag og sungkod, Wheelchair sa mga senior citizens

CEBU, Philippines - Bisan og suspendido pa siya sa katungdanan, apan si Cebu City Councilor Jerry Guardo padayong miserbisyo sa katawhan pinaagi sa pagpanghatag og libre nga sungkod ngadto sa mga senior citizens.

Gatosan na ka senior citizens nga lumolupyo sa south ug north district dinhi sa dakbayan sa Sugbo ang nahatagan og sungkod ni Guardo, subay sa iyang programa nga “Agak ni Guardo.” Gawas sa sungkod, si Guardo nanghatag na usab og wheelchairs.

Kagahapon, si Guardo nanghatag na usab og dugang 100 ka sungkod ngadto sa mga tiguwang nga mahinangpon kaayo nga midawat. Ang pagpanghatag ni Guardo sa mga sungkod gitambongan usab nila ni Konsehal Margarita “Margot” Osmeña ug Konsehal Eugenio Gabuya Jr.

Ang higala ni Guardo nga usa ka Japanese national ug tagdumala sa Mizuki Enterprises maoy mitabang sa konsehal aron matabangan nila ang mga senior citizens nga nanginahanglan og mga sungkod ug wheel chairs.

Pagkakaron miabot na og 50 ka wheelchairs ug 400 na ka sungkod ang nahatag ni Guardo. Ika-upat na kadto nga batch kagahapon sa pagpanghatag og sungkod ni Guardo sa mga senior citizens, diin 100 ka buok sungkod ang iyang ipanghatag kada batch.

Matud ni Guardo nga wala siya’y gipili nga hatagan sa maong mga sungkod.

“No requirements. As long as you need it” sigon ni Guardo.

Dako usab kaayo kini nga kalipay sa mga senior citizen sama ni Josima Ybañez, 83-anyos taga Barangay Luz. Matud ni Ybañez nga ang sungkod makatabang kaayo kaniya kay maglisud na siya paglakaw nga wala’y magunitan.

Nanghinaot usab si Ybañez nga mahatagan og atensyon sa kagamhanan ang ilang mga gikinahanglang tambal kay daghan na kaayo siya’g gipamati sa iyang lawas. Zeny Tapuyao (BANAT NEWS)