Seguridad pahugtan sa CCJ ug Second Chance

CEBU, Philippines - Dugang seguridad ipatuman dili lang sa Operation Second Chance apan lakip na sa Cebu City Jail aron dili na masubli ang nahitabo niadtong miaging adlaw diin adunay gipalusot nga mga kontrabando pinaagi sa mga menor de edad.

Si Konsehal Dave Tumulak, Deputy Mayor for Police Matters nagkanayon nga nagkahinabi na sila ni JSupt. Arnel Peralta ang warden sa city jail ug miingon kini nga dungagan niini ang security ilabi na sa dapit nga duol sa Operation Second Chance.

Matud ni Tumulak, nasurpresa ang city jail sa maong hitabo hinungdan nga gipasalig ni JSupt. Peralta nga pahugtan ang pagpatuman sa seguridad ug pagdili gyud sa pagpasulod sa mga kontrabando sama sa sigarilyo, lighter ug drug paraphernalia.

Giingong naalarma usab ang city jail gumikan sa nasakmit nila niadtong miaging adlaw nga mga plastic nga gituohang sudlanan sa ilegal nga drugas.

Sa habig sa kagamhanan sa Siyudad sa Sugbo nga maoy nag-operate sa Operation Second Chance, mohimo usab sila og lakang aron wala na’y kontrabando nga mahimo pang ilabay sulod sa center.

Ang Operation Second Chance mao ang center alang niadtong mga minor offender ug sigon ni Tumulak nga wala’y problema sa rehabilitation sa maong lugar.

Hinoon bisan sa maong hitabo wala’y plano ang siyudad nga hulipan ang nagdumala niini kay mihimo man sila sa ilang trabaho.

Kahinumduman nga aduna’y gipasar nga ordinansa si Tumulak nga nagdili sa mga kontrabando sa city jail apan gibasura kini sa Committee on Laws. Apan gumikan sa nahitabo, subli niya kining i-file kay mao kini ang gikinahanglan sa kadagkuan sa maong pasilidad aron mapahamtangan og tukmang silot ang masakpang mopalusot og kontrabando. (BANAT NEWS)