Gibanggaang poste hinungdan sa brownout

CEBU, Philippines - Nilanat sa sobra 12 ka oras ang brownout sa may Salinas Drive sa Barangay Lahug, Dakbayan sa Sugbo human gibanggaan sa usa ka dumptruck ang poste sa Visayan Electric Company (VECO) kagahapon sa kadlawon.

Matud ni Quennie Bronce, ang tigpamaba sa VECO nga nabanggaan ang ilang poste pagka alas 2 sa kadlawon ug pagka alas 2 sa hapon kagahapong adlawa padayon pa nila kining giilisan og bag-ong poste ug transformer.

"Dili pa gyud siya mosiga kay daku siya nga work. Usa ka primary pole ang affected. Mag-ilis gyud og poste and transformer kay affected ang primary line and transformer," matud pa ni Bronce.

Sa pagsulat niining balita, 31 ka kostumer sa VECO ang apektado nga anaa sa may Gorordo Avenue.

Nasayran nga gawas sa poste sa VECO, nabanggaan usab ang usa ka poste nga gipanag-iya sa usa ka telecommunication company.

Ang VECO niawhag sa katawhan nga mo-report gyud dayon kanila kun adunay emergency brownout aron marespondehan dayon nila kini. (BANAT NEWS)