4 ka pugante nadakpan pagbalik

CEBU, Philippines - Nadakpan pagbalik sa kapolisan ang upat sa lima ka pugante sa Compostela Police Station kaniadtong Biyernes sa kaadlawon. Pagka karon, ang usa na lang ka pugante ang gipangita pa sa mga polis.

Si SPO2 Jaime Maroliña, ang jailer nga naeskapohan sa mga piniriso, miingon nga anam-anam nila nga nadakpan ang upat ka pugante sa lainlaing dapit.

Iyang giila ang mga nadakpan nga sila si Ruben Catipay, Joel Cuyos, Joseph Pio Mahinay ug Giovanni Tapayan. Ang gipangita pa mao si Nelson Agbay nga maoy mastermind sa pagpuga.

Ang una nga nasikop kaniadtong Biyernes sa hapon mao sila si Catipay ug Cuyos, samtang si Mahinay nadakpan kagahapon didto sa Barangay Jubay, Liloan kay nakit-an sa mga tawo nga nibisita kini sa iyang kapuyo.

Ang kapuyo ni Mahinay nitabang sa kapolisan aron madakpan pagbalik ang pugante sulod sa internetan samtang nakig-chat sa iyang ginikanan. Si Tapayan didto usab madakpi sa bukiran nga bahin sa Talamban.

Adunay nakasulti nga si Tapayan misulti nga kun siya makalayas, motago siya sa bukid sa Talamban. Nangikyas sila alas kuwatro sa kaadlawon samtang nangatulog ang ubang mga piniriso.

Giangkon ni SPO2 Maroliña nga kaniadtong 1997 naimbestigar usab siya kay apil siya sa mga polis nga napugahan og binilanggo dihang didto pa siya madestino sa Liloan Police Station.

Nahibaw-an nga wala mabantayi sa kapolisan nga ang mga binilanggo nakapalusot og gabas sa puthaw ug maoy gigamit nila sa paghinay-hinay og putol sa rehas sa bilanggoan nga walay kasayuran ang mga polis.

Ang selda sa Compostela Police Station angay ra unta sa walo ka piniriso, apan karon dul-an na sa 40 ka binilanggo ang nag-ukopar.

Sagad sa mga piniriso naghimo og duyan sulod sa selda kay dili sila makatulog sa sawog tungod sa kahuot.

Matud ni Compostela Police Chief Romeo Caacoy nga gihinay-hinayan na diay paggabas sa mga piniriso ang rehas nga puthaw nga dili gayud mabantayan gikan sa pultahan sa bilanggoan. - /RUB) (BANAT NEWS)