Konseho sa Talisay nasayop og pasalamat

CEBU, Philippines - Himuan na lang og laing resolusyon sa konseho sa Dakbayan sa Talisay aron pasalamatan ang Bureau of Fisheries and Aquatic Resources (BFAR) gumikan sa ilang paghatag og 20 ka pump boat ngadto sa mga mananagat sa nahisgutang siyudad.

Niadtong Martes atol sa sesyon sa konseho, nipasar sila og resolusyon sa pagpasalamat kang Senador Sonny Angara tungod sa maong pagpang-apud-apud sa pump boat apan nasuta nga ang senador, nisakay lang sa kalihukan ug walay kalabutan kay proyekto man kadto sa BFAR.

Gani mismo ang taga BFAR natingala dihang naabot si Angara sa kalihukan.

 Ang bise mayor sa Talisay Alan Bucao niingon nga lakip siya natingala kun nganong anaa si Angara. Gani sa gihimong open forum, wala kaayo kini makatubag sa mga pangutana sa mga mananagat.

 Matud ni Bucao nga pasagdan na lang ang una nilang resolusyon nga nagpasalamat kang Angara samtang iyang hangyuon si Konsehal Antonio Bacaltos Jr. nga mopalabang og laing resolusyon pagpasalamat sa BFAR.

 Dugang sa bise mayor nga magsilbi kining leksiyon kanila, ingon man sa ilang mga staff nga tarungon gyud sa pagsusi ang bisan unsa nga kalihukan nga ilang tambungan. Gitug-an niini nga nawagtang sa programa ang regional director sa BFAR-7 nga si Alan Poquita tungod sa presensya sa senador. Gani wala na man naka-istorya si Poquita atol sa programa. (BANAT NEWS)