Police asset sa Talisay, nangahadlok na?

CEBU, Philippines - Hangtud karon, wala pa’y matumbok ang Talisay City Police kun kinsa ang nagpatay sa ilang asset nga babaye niadtong miaging semana sa Barangay Tabunok.

Si PSupt. Emerson Dante, hepe sa kapolisan sa Dakbayan sa Talisay nagtuo nga ang mga tawo o grupo ra sab nga gisumbong ni Kenyar ang nagpatay kaniya.

 Matud ni Dante nga naluya gyud ang ilang grupo ingon man ang ilang mga asset sa pakig-alayon gumikan sa hitabo. Hinoon iyang gipasabot ngadto kanila nga kun gusto sila nga aduna’y kausaban sa ilang lugar, dili angay tugutan nga pasagdan na lang kadtong maghimo og binuang o ilegal sa ilang dapit.

Tambag ni Dante sa iyang mga sakop ug sa ilang mga asset nga magmatngon ingon man mag-ampo sa Labaw’ng Makagagahum nga iiway sa dautang panghitabo ug mga tawo.

“Nagdadalawang isip na sila na magbigay nang info sa amin. Sabi ko nga sa kanila kung pababayaan natin ang masama lalong lumalala sila,” matud pa ni Dante.

Si Kenyar nga asset sa kapolisan maoy hinungdan sa tulo ka sunod-sunod nga pagpangronda sa mga polis sa lugar sa mga durugista niadtong miaging semana. Apan dihang nahibaw-an, gi-ulo kini sa pagpusil samtang naglakaw.

Matud ni Dante, usa sa mga dakong isda sa ginadiling drugas ang usa sa ilang nasikop niadtong tungora nga mao si Adhman Canangcaan. Giila nila kini nga high value target kay mao kini ang drayber ni Konsehal Felix Abacajan sa Brgy. Maghaway nga nakigpinusilay sa kapolisan niadtong miaging tuig. (BANAT NEWS)