LGUs maoy pabut-on sa rota
CEBU, Philippines - Natunga ang baruganan sa mga transport group sa buot mahitabo sa Land Transportation Franchising and Regulatory Board (LTFRB) nga ang Local Government Unit (LGU) na ang mohimo sa ilang tagsa-tagsa ka Local Transport Route Plan (LTRP).
Sa gipahigayong konsultasyon sa Visayas Omnibus Franchising Guidelines, matud ni LTFRB chairman Martin Delgra nga ang mga LGU ang mas nasayod sa kahimtang sa trapiko sa ilang lugar.
"Ang LGU man ang mas nasayod kun unsang klase sa transportasyon ang angay ibutang sa ilang lugar. Sila usab ang nasayod sa mga rota kun asa moagi ang mga sakyanan," matud pa ni Delgra.
Dugang niini nga ang LTRP i-sumiter kanila ug ilang sutaon kun ang maong plano nagsubay ba kini sa transportation modernization program.
Human masuta sa LTFRB ug sakto ang maong plano, ila na kining aprubahan ug anha pa ilibkas ang franchise moratorium sa lugar. Apan dili uyon niini ang militanteng grupo sa transportasyon.
"Dili gyud mi uyon ana," matud pa ni Greg Perez, coordinator sa Pinagkaisang Samahan ng mga Tsuper Nationwide (PISTON-Cebu).
Dugang niini nga mas maayong wagtangon na lang ang maong ahensiya kay gipasa na man hinoon sa LGU ang ilang trabaho.
Samtang si Ryan Yu, ang general manager sa Cebu Integrated Transport Service Multipurpose Cooperative (CITRASCO) nga wala silay supak sa LTRP.
"Yes in favor ko but recommendatory lang ang LGU," matud pa ni Yu. (BANAT NEWS)
- Latest
