Mga opisyal nga apil sa drugas nailhan na

CEBU, Philippines - Ang kadagkoan sa Philippine Drug Enforcement Agency (PDEA) may mga ngalan na sa mga opisyal sa siyudad, kalungsoran ug kabarangayan dinhi sa Central Visayas nga nalambigit sa negosyo sa ilegal nga drugas, ug kadtong nagsilbi nga protektor sa mga drug lords.

Gitug-an kini kagahapon ni PDEA Director General Isidro Lapeña atol sa iyang pagbisita sa Sugbo ug nahinabi sa mga reporters. Apan wala motug-an si Lapeña kun kinsa ang maong mga opisyal nga matud pa gipanid-an na sa mga PDEA agents.

Matud ni PDEA-7 Regional Director Yogi Filemon Ruiz nga gitahasan siya ni Lapeña nga mohimo og imbestigasyon niining maong mga opisyal. “We couldn’t mention them, but investigations are being conduted right now,” matud pa ni Ruiz.

Si Ruiz miingon nga daghan gyud ang anaa sa listahan ug gawas sa mga opisyal sa barangay, may mga naapil usab mga konsehal sa lungsod ug siyudad. Dunay mga report nga usa ka mayor dinhi sa Sugbo nalambigit sa negosyo sa drugas, apan gisusi pa kini sa PDEA.

Ang tanang 80 ka barangay kapitan dinhi sa dakbayan sa Sugbo nakahatag na og lista ngadto sa PDEA sa mga drug personalities sa tagsa-tagsa nila ka dapit, ug ang maong mga ngalan gisusi na sa PDEA.

Matud ni Ruiz nga ang maong mga lista nga gisumiter kaniya sa mga kapitan sa kabarangayan napuslan gyud nila ug gani nakapahigayon na sila og anti-drugs operation sa makadaghan na nga higayon.

“It has already produced results, very productive na. Pila na ka barangay ang nahimoan namo og operation, I can say more than 10 na, and the information came from the barangay chairmen,” sigun pa ni Ruiz.

Karong sunod semana, pangayoan ni Ruiz og lista sa mga drug personalities ang mga opisyal sa barangay sa probinsya. Tungod sa pagkalambigit sa daghang opisyal sa barangay sa problema sa drugas, pabor si Lapeña nga ipanudlo na lang ni Presidente Duterte ang mga opisyal kun madayon nga mauktaba ang barangay election.

Kombinsido si Lapeña nga malagmit daghang drug lord ang mogasto og drug money aron makadaog sa barangay election ang ilang mga tawo nga makatabang kanila aron maprotehean ang ilang negosyo.

“If you have barangay captains connected with the drug syndicates, chances are, that will go to the mayors, up to the political hierarchy,” matud ni Lapeña. (BANAT NEWS)