Nasakmit ang P1.3 milyones shabu

CEBU, Philippines - Onse ka mga tawo ang nadakpan ug balor P1.3 milyon nga shabu ang nasakmit sa kapolisan sa Dakbayan sa Lapu-Lapu, Talisay ug Toledo Cities sa managlahing buy-bust operations.

Si Police Chief Inspector Mark Gifter Sucalit sa City Intelligence Branch (CIB) sa Lapu-Lapu City Police Office (LLCPO) miila sa tulo ka pusher og shabu nga ilang nadakpan sa Brgy. Mactan mao sila si John Carlo  Agosto Bahio, 22, David Tantano Dayocot, 28 ug Michael Baring Roa, 30.

Matud pa ni Chief Inspector Sucalit nga mokabat sa 50.6 gramos ang shabu nga ilang nasakmit gikan sa tulo nga mokabat sa P597,080 ang kantidad niini.

Dugang nasakmit ang mga drug paraphernalia, buy-bust money nga P15 mil, cash nga P1,100 nga gituohang halin sa shabu.

Sa Punta Engaño nadakpan sa buy-bust operation sila si Daren Sanuele Cabahug, 30, Louie Jay Malingin Durano, 22 ug Richard de Jesus Roa, 26, ug nakuhaa’g 68 gramos nga shabu nga mokabat kini og P802,400 ang kantidad.

Samtang sa Lungsod sa Consolacion nadakpan si Leonisa Yap, 52,  apan ang target nga si Jesus Hayag nakamatikod  ug nakaikyas.Sa laing bahin, aksidenteng nadakpan sa kapolisan sa Dakbayan sa Talisay ang tawong apil sa drug watch list sa Sitio Magay, Brgy. Tanke samtang sila mo-serve unta og warrant sa laing wanted.

Ang gidakop mao si John Carlo Larvis alyas Aloy, 22, taga Sitio Rattan sa maong barangay kinsa nasigpatan sa lugar ug gisikop  apan ang ilang target sa warrant nakaikyas.

Nakuhaan si Larvis og 20 ka gagmay nga pakete sa shabu nga aduna’y timbang nga 0.4 gramos.

Didto sa Toledo City nadakpan usab sa managlahing buy-bust operations sa kapolisan silang Vicky Jane Bardoquillo 37, nga target sa operasyon , ug silang Gymbe Intes 31, ug si Hannah Grace Waban 22. Laing nadakpan si Benjie Tomarong, 29.

Nakuha sa kapulisan ang usa ka gamay nga pakete ug usa ka medium size nga gituohang shabu ug P800 nga halin.

Samtang nadakpan usab didto sa St. Joseph Subdivision Brgy. Cogon, Siyudad sa Bogo si Don Wilfred Ruedas, 26, pinasikad sa search warrant human nakuhaan og usa ka medium ug 21 ka gagmay nga paketeng gituohang shabu, P150 mil nga gituohang halin sa drugas, usa ka kalibre 45 pistola, mga bala, drug paraphernalia ug listahan sa gituohang iyang ka-transaksyon sa drugas. - Raymond D. Abarcas ug Ermida Q. Moradas /EIM) (BANAT NEWS)