Walo sikop sa drug bust

CEBU, Philippines - Arestado ang walo ka mga tawo sa managlahing operasyon sa kapolisan ug mga sakop sa Philippine Drug Enforcement Agency, apan diriyot pa magka-mis-encounter sa usa sa mga operasyon kagahapon.

Sa gihimong buy-bust operation sa mga sakop sa PDEA-7 diha sa dalan  Tres de Abril, Brgy Pahina San Nicolas ning sa Dakbayan sa Sugbo, nakuha ang gibana-banang P216 mil nga drugas.

Ang nangadakpan mao silang Lucero Manuel,67, ang giingong target sa operasyon ug giingong nagpadagan sa drug den sa lugar.

Lakip sa gidakop sila si Carlo Limbaga, 40; Romar Mena, 25; Almie Ramirez, 34; Miller Bacus, 50; Alberto Sandoval, 49; ug ang babayeng si Charo Roa, 37.

Gibanabanang 60 gramos nga gidudahang shabu ang nasakmit. Matud pa sa PDEA, ang impormasyon nga ilang nadawat bahin sa operasyon ni Manuel nagagikan sa Barangay Anti-Drug Council (BADAC).

Atol sa operasyon niresponde ang mga polis ug mga sakop sa Mobile Patrol Group tungod kay adunay mitawag bahin sa usa ka armadong tawo nga nagdala og tag-as nga armas.

Hinuon pagkakita sa mga polis nga mga sakop sa PDEA-7 ang mga armado wala na sila mosita kanila.

Samtang gibanabanang P885 mil nga kantidad sa shabu ang nasakmit sa mga sakop sa Guadalupe Police Station diha sa Brgy. Tisa ning dakbayan.

Ang operasyon gipangulohan ni Senior Inspector Elisandro Quijano ug niresulta sa pagkasikop ni Aloney Labitad alyas Loney, 28. (BANAT NEWS)