Gica balik pagkamayor
CEBU, Philippines - Gibakwi sa Office of the Ombudsman-Visayas ang nauna nila nga desisyon sa pag-dismiss kang Dumanjug Mayor Efren Guntrano Gica sa serbisyo sa kasong dishonesty ug grave misconduct.
Si Graft investigation and prosecution officer III Portia Pacquaio miusab sa iyang desisyon human niya makita nga dunay basihan ang motion for reconsideration ug supplemental motion for reconsideration ni Gica.
Si Gica nagkanayon nga wala siya makadawat og order nga patubagon sa pasangil batok kaniya. Si Gica ibalik isip mayor sa Dumanjug samtang magpaabot pa sa pinal nga desisyon sa maong kaso
Gimandoan si Gica nga moduso og counter-affidavit sud sa napulo ka adlaw gikan sa pagkadawat niini sa kamandoan.
Kahinumduman nga si kanhi Dumanjug mayor Nelson Garcia ni mikwestiyon sa liquidation report nga giduso ni Gica diin migasto siya’g P28,565 alang sa panihapon sa mga barangay officials nga nitambong sa Association of Local Barangay Officials seminar apan matud pang Garcia sa pagkatinuod P11,435 ra ang nagasto.
Tungod kay wala makaduso og tubag si Gica sa iyang tubag, ang Office of the Ombudsman midesisyon nga “administratively liable” si Gica sa kasong dishonesty ug grave misconduct diin ang silot mao ang pagtangtang kaniya sa serbisyo.
Niadtong Pebrero 6, 2017 niduso og motion for reconsideration sa Ombudsman ug didto iyang napasabot nga wala siyay nadawat nga mando aron tubagon ang mga pasangil ni Garcia nganha kaniya.
Gawas sa counter-affidavit ni Gica, gimandoan usab si Garcia sud sa napulo ka adlaw pagduso og reply-affidavit. (BANAT NEWS)
- Latest