1 patay sa drug bust

CEBU, Philippines - Usa ang patay sa nahitabong shoot-out sa usa ka operasyon nga gipahigayon sa mga kapulisan sa lungsod sa Naga didto sa Brgy. Langtad kagahapon sa udto.

Ang namatay naila nga si Wilfredo Baricuatro, 32, taga South Poblacion ning Dakbayan sa Naga.  Si Baricuatro maoy kauban sa target sa operasyon nga si Ruben Gabasa nga lumad sa maong barangay.

Matud pa ni PO3 Micheal Villamia, nga samtang gipahigayon ang operasyon sa kapulisan kalit lang mipasalba si Baricuatro gamit ang kalibre .45  nga pistol human nakabantay nga pulis ang kasabot sa iyang amigo hinungdan nga napugos ang kapulisan sa pagpusil sa suspek.

Daling gidala si Baricuatro sa Minglanilla District Hospital apan gideklarar kini nga dead on arrival sa mga mananambal.

Sa laing bahin si Gabasa, nasakmitan sa kapulisan og siyam ka gagmay nga pakete ug duha ka medium nga pakete sa gituohang ginadiling drugas.

Kasamtangan na karong gitanggong si Gabasa sa Naga Police Station.

Samtang upat ka gidudahang drug pushers apil ang usa ka 50 anyos nga babaye ang nadakpan sa Sitio Mahayahay, Brgy Bankal, Dakbayan sa Lapu-Lapu.

Ang mga nadakpan mao sila si Christopher Malingin Ugsang alyas Topi, 21, Randy Ponce Inot, alyas Obit, 29, Rex Paul Pataling ug Juana Taghoy Ponce alyas Nita, 50.

Nakuhaan sila og daghang pinaketeng shabu uban sa mga drug paraphernalia. - /EIM) (BANAT NEWS)