Mayor nalipay sa matinud-anong negosyante

CEBU, Philippines - Gikalipay ni Mayor Tomas Osmeña nga adunay mga gagmay’ng magpapatigayon sa Dakbayan sa Sugbo nga mitug-an nga bisan sa kagamay sa ilang negosyo apan ang gibayran nilang buhis sa City Hall mas dako pa kay sa gibayad sa BDO Magallanes Branch.

Wala motug-an si Osmeña kun ang maong mga magpapatigayon apil ba sa iyang ipresentar sa hukmanan kabahin sa kaso nga gipasaka niya sa kadagkoan sa BDO nga gipasanginlan niyang wala mobayad sa tukmang buhis sa City Hall sa paglukat nila og business permit.

Si Rohanie Asal, usa ka Muslim nga naninda og mga cellphone accessories sa gamay kaayo niya nga tindahan sa eskina Legaspi ug Colon, mitug-an nga mikita siya og P980 mil sa iyang mga baligya.

Gitug-an sab ni Asal ngadto sa mga kawani sa City Hall sa paglukat niya og business permit nga ang gamay niyang repair shop mikita og mga P220 mil sa tibuok tuig.

Kay mideklarar man si Asal og P1.2 million nga kinitaan sa tibook tuig, gipabayad siya og P10 mil nga business tax. Gidayeg ni Osmeña ang maong negosyante ug ang uban pa nga wala manikas sa pagbayad nila sa buhis.

Matud ni Osmeña nga dili gyud katuohan nga ang BDO-Magallanes Branch mikita lang og P400 mil nga “gross income” sa tibuok tuig, samtang ang maong gamay’ng tindahan mikita og kapin sa milyon ka pesos.

Gipasabot sa mayor nga ang iyang tinguha nga mobayad gyud og buhis ang mga negosyante gitumong aron magamit kini sa mga proyekto nga makabenepisyo sa katawhan. (BANAT NEWS)