Lungkab duol police station

CEBU, Philippines - Gustong paespli-karon sa director sa Police Regional Office-7 ang Mandaue City Police, Station 3 kun nganong wala sila  makabantay sa nahitabong paglungkab sa usa ka botika duol sa ilang buhatan.

Alang ni Chief Supt. Noli Taliño nga ang usa ka police station angayan nga masayod kung unsa ang nanghitabo sa iyang palibot mas labi na kung anaa lang sa duol ang insedente aron maka-tubag dayon sa mga hitabo.

“Yun nga, pinai-explain nga natin. Iyong ating oversight committee ay tinitingnan kung saan mataas ‘yung robbery, mataas ‘yung physical injury. Dapat ang police station ay ina-address ito,” saysay pa ni Taliño.

Tan-awon sa rehiyonal nga buhatan ang kung duna ba’y tulobagon ang maong police station sa maong hitabo. Samtang dako ang pagduda sa Mandaue City Police Office nga inside job ang nahitabong pagpanglungkab sa maong botika diha sa Sitio Fatima, Brgy. Basak4 nga niresulta sa pagkahanaw sa wa pa ibutyag nga kantidad sa salapi gikan sa safety vault niini.

Si Chief Inspector Mercy Villaro, ang tigpamaba sa Mandaue City Police Office miingon nga posibleng adunay kakunsabo ang mga kawatan sa sud kay way timailhang pugsanong giablihan ang maong botika.

"Wala'y traces nga nabungkag ang ubang items except ra nidiretso sa vault. Ang ilang vault wala sad traces nga gipugos og open," matud pang Villaro.

Ang pagpanglungkab nadiskubrehan Lunes sa buntag dihang mangabli na ang branch manager nga si Jollibee Armenteros. Iyang nakita nga abli na ang counter ug iyang opisina.

Gitug-an ni Armenteros nga daghan sa ilang mga butang ang nangabungkag ug ang vault pugsanong giablihan ug gikuha ang kwarta sa sud.

Nasuta usab nga gitangtang ang koneksyon sa closed-circuit television (CCTV) camera ug gitangtangan og sensor ang block box sa ilang security alarm system. Matud pa ni Villaro wa pa mohatag ang manager sa eksaktong gidak-on sa kantidad nga gikawat. Ang MCPO nagpatabang na sa Scene of the Crime Operations (SOCO) aron manguha og fingerprints sa crime scene.

"If during cross matching of the standards, if there were no one matches this office will request the crime laboratory for polygraph test to some of the personnel in the store," dugang pa ni Villaro. Jojo Ugdol ug report gikan sa The Freeman (BANAT NEWS)