Mga suspek pagpatay sa abogada nailhan na

CEBU, Philippines - Usa ka manhunt operation ang gimando ni Chief Superintendent Noli Taliño, director sa  Police Regional Office-7 ngadto sa kapulisan aron sa pagdakop sa mga suspetsado sa pagpatay sa usa ka abogada niadtong Miyerkules sa Purok  2, Sitio Lanao, Brgy. Dao, Tagbilaran City.

Si Atty. Mia Manuelita Mascariñas-Green nagmaneho sa iyang Toyota Innova gikan nagkuha sa iyang tulo ka mga anak sa eskuylahan dihang kalit siyang gipusil sa duha ka lalaking nagsakay og motor.

Si Taliño nagkanayon nga iyang gimandoan si Bohol Provincial Police Office Director, Senior Superintendent Felipe Natividad nga lutoson gyud ang mga responsable sa maong linoog nga krimen.

Nigawas karon sa imbestigasyon nga ang pagpatay kang Green may kalambigitan sa kaso sa yuta nga iyang gikuptan.

Si Green asawa sa British marine biologist nga si Stuart Green. Ang abogada namatay samtang gitabang sa tambalanan samtang walay naigo sa iyang tulo ka anak ug katabang nga iyang kauban sud sa sakyanan atol sa pag-ambush.

Si Tagbilaran City Police Station chief, Senior Superintendent Nicomedes Olaivar, Jr., nagkanayon nga duna na silay mga pangalan sa mga killers ug nagtuo sila nga anaa pa sila sa Bohol.

Matud pa ni Olaivar nga ang Special Investigation Task  Group (SITG) nga gilangkoban sa Tagbilaran City Police Station, Bohol Criminal Investigation and Detection Group (CIDG), Bohol Provincial Intelligence Branch (PIB), Bohol Provincial Police Safety Company ug Bohol Tourist Police Unit ug National Bureau of Investigation nagtinabangay pagpangita sa mga suspetsado.

Away sa yuta

Matud ni Olaivar nga usa sa mga suspetsado tag-iya og usa ka resort sa Panglao, Tagbilaran City nga giingong nihulga sa iyang ugangan ug naabot sa korte ang ilang kasungian.

Sumala pang Olaivar ang ugangan sa maong resort owner maoy kliyente sa abogada.

“Init kaayo ang kaso, kapildihon na sila (suspect) tungod sa evidence nga nag-prove nga ang real owner kay ang ugangan sa suspek. So mao ‘to nakabantay, nanabla sila,” matud pa ni Olaivar.

Kagahapon sa kaadlawon gi- serve sa SITG ang search warrant batok sa usa ka Romarico Benigi-an tungod sa illegal possession of firearms and illegal possession of dangerous drugs sa Purok 7, Brgy. Tawal, Panglao.

Apan wala didto ang suspek apan adunay nakuha ang SITG nga usa ka .38 caliber revolver, duha ka bala niini, granada, ug usa ka pack nga gituohang shabu.

Wa usab ibutyag kun unsay partisipasyon ni Benigi-an sa maong krimen.

Ang Integrated Bar of the Philippines (IBP) Bohol chapter gusto nga ang National Bureau of Investigation (NBI) ang moimbestigar sa kaso.

Si IBP Bohol president Atty. Ted Lagang sa usa ka interbyu sa lokal nga sibyaanan didto miingon nga ang pagpatay kang Green dili makapahunong kanila pagpadayon sa ilang serbisyo ilabi na sa mga nagkinahanglan niini.- Ug report gikan sa The Freeman