Red plate gigamit gyud sa kasal

CEBU, Philippines - Giangkon sa konsehal sa Barangay Pung-ol Sibugay nga gigamit gyud sa kasal ang sakyanan sa gobiyerno nga Toyota Hi-Lux nga dunay plakang SKV 369 diin ang hulagway nikatap sa Facebook.

Kini ang gibutyag sa pangulo sa General Services Office sa Dakbayan sa Sugbo, Ronald Malacora, human sa gihimong pakisusi.

Matud ni Malacora nga giangkon ni Konsehal Medardo Coca Jr., nga gigamit sa kasal ang sakyanan tungod kay nisanong siya sa hangyo sa iyang konstituwente nga gamiton ang sakyanan tungod kay naaberya ang bridal car sa kinasal nga giingong ni-overheat ug dili na makasaka sa bukid.

Dili sab kabanay sa konsehal ang gikasal tungod kay lahi man ang apelyedo niini.

Giduso na sa GSO ngadto sa City Legal Office ang kaso aron pagdeterminar kung duna bay tulubagon o wala ang konsehal.

Mag-agad usab ang GSO sa City Legal Office kung unsa’y ipahamtang nga silot kung mapamatud-an nga duna’y kalapasan nga nahimo ang konsehal ug kun gigamit kini sa personal o wala.

Pahimangno ni Malacora nga kung dili gyud kalikayan nga magamit ang sakyanan sa lain sama sa nahitabo sa Pung-ol Sibugay, buhatan gyud kini og dokumento ug dili sab kalimtan ang trip ticket sa dili pa mobiyahe. (BANAT NEWS)