DOLE, DepEd giawhag pagbatok sa child labor

CEBU, Philippines - Ang mga local governemnt units  sa probinsiya lakip na ang Department of Labor and Employment ug Department of Education, giawhag sa hunta probinsiyal nga mopalapad sa all-out nga kampaniya batok sa child labor.

Si Bokal Thaddeo Jovito Ouano nagkanayon nga ubos sa Philippine Constitution, ang kabataan adunay katungod sa assistance, saktong pag-atiman, nutrition, special protection batok sa tanang pangabuso, exploitation ug uban pa nga makaapekto sa ilang development.

Subay sa PD 603 kon “Child and Youth Welfare Code”, nga ang kabataan maoy usa sa mga labing importante nga assets sa nasud mao nga kinahanglan mogama og mga lakang alang kanila.

Si Ouano nagkanayon nga ang problema sa child labor padayong nagsaka diin base sa survey sa International Labor Organization ug NSO nga sa tuig 2012, dinhi sa nasud adunay 5.59 milyones nga child laborer ug kasagaran kanila nagtrabaho sa mga  delikado nga kondisyon.

Napugos sila niini tungod sa kalisud sa panginabuhi, kuwang sa oportunidad sa ekonomiya ug survival sa ilang pamilya nga naglisod sa panginabuhi.                   

Dugang ni Ouano nga ang DepEd kinahanglan mogama og  education program nga magpauswag sa  mga child laborer nga wala ka-eskwela. Ug ang tanang all-out campaign sa child labor sa probinsiya kinahanglang aduna kini koordinasyon sa DOLE ug DepEd. Ang mga LGU kinahanglang motabang sa pagpahigayon og monitoring sa statistics sa mga kaso sa child labor sa ilang mga lugar. Dugang sa bokal nga ang mga LGU adunay dakung role alang sa kaayohan sa kabataan. Brenda D. Batuto ug Le Phyllis F. Antojado (BANAT NEWS)