SAF44 gihandum, hustisya padayong gipanawagan
CEBU, Philippines - Gipahigayon kagahapon sa Police Regional Office-7 ang misa pahinumdum sa Mamasapano massacre duha ka tuig na ang nilabay diin nikalas sa 44 ka sakop sa Special Action Force (SAF).
Ang misa gitambungan sa mga opisyal sa PRO-7 nga gipangulohan ni Chief Supt. Noli Taliño, provincial ug city police directors, pamilya nilang kanhi Police Officers 2 Windel Candano ug Romeo Cempron, mga sakop sa SAF.
Matud ni Taliño nga gibati gihapon nila ang kasakit sa hitabo ilabi na nga nahimo siyang acting SAF commander nunot sa pagrelibo kang Director Getulio Napeñas human sa insidente.
“Pag naalala ko especially nakikita yung families (of fallen SAF commandos), nararamdaman ko yung pain,” matud niya.
Ang target nga si Zulkifli bin Hir alyas Marwan napatay niadtong higayuna.
Si Dr. Christine Cempron, asawa ni PO2 Cempron, ug Maria Candano, inahan ni PO2 Candano, nangita gihapon og hustisya.
Matud nila nga naa gihapon ang kasakit nga ilang gibati matag Enero 25, ang adlaw nga nangamatay ang ilang mga hinigugma.
Samtang si Taliño nagkanayon nga wala sa SAF ang reward nga $5-million sa pagdakop kang Marwan.
“Walang binigay sa SAF. During the time hindi namin inisip yung reward money kasi hindi naman kasama sa planning namin. Kung may pupuntahan man yun ay doon sa intelligence asset pero hindi hawak ng SAF yun,” matud niya.
Si Presidente Rodrigo Duterte nangita sa maong reward human si Marwan ang napatay sa mga polis sa maong operasyon nga nipatay sab sa 44 ka sakop sa SAF sa Tukanalipao, Mamasapano, Maguindanao niadtong Enero 25, 2015. (BANAT NEWS)
- Latest
