Hinabang ihatag sa mga nasunugan sa Dumanjug

CEBU, Philippines - Makadawat og hinabang gikan sa Kapitolyo ang mga nasunugan sa Barangay Tangil, Lungsod sa Dumanjug niadtong buwan sa Disyembre.

Niabot sa 26 ka pamilya ang nabiktima sa sunog diin ang maong insidente nahitabo duha ka adlaw sa wala pa ang Bag-ong Tuig.

Ang matag usa ka pamilya nakadawat na og tag P5,000 nga pinansiyal nga hinabang gikan sa kagamhanan sa lungsod.

Giingong 10 ka balay ang naugdaw sa maong sunog nga niabot sa P1 milyon ang gibana-banang danyos niini. Gawas sa hinabang pinansiyal, ang mga nasunugan nakadawat sab og housing materials gikan kang Kongresista Peter John Calderon ug Konsehal Allan Quirante sa Lungsod sa Dumanjug.

Samtang ang kagamhanan sa probinsiya pinaagi nila ni Bokal Christopher Baricuatro ug Jerome Librando ang nangapod-apod og mga gamit sa kusina, banig, habol ug mosketero sa mga nasunugan.

Sa laing bahin, si Gobernador Hilario Davide III ug Bise Gobernador Agnes Magpale nisaad ngadto sa mga residente sa lugar nga mohatag og P100,000 nga pinansiyal nga hinabang alang sa pagpaayo sa tinubdan sa tubig.

Si Calderon sa iyang bahin nisaad sab nga mohatag og hinabang alang sa mga anak sa nasunugan aron makapamalit kini sa ilang mga gikinahanglan sa eskwelahan.

Matud niya nga ang matag pamilya makadawat og P3,000 nga hinabang alang sa ilang mga estudyante sa high school ug P5,000 alang sa nag-eskwela sa kolehiyo. Si Calderon nihangyo sa Department of Interior and Local Government (DILG) nga hatagan og bag-ong fire truck ang lungsod.

Si Mayor Efren Gica mapasalamaton sa mga opisyal sa Kapitolyo ug kang Calderon tungod sa tabang nga gihatag niini ngadto sa mga nasunugan. (BANAT NEWS)