Tommy nangayo’g tabang sa Muslim community
CEBU, Philippines - Nakigtagbo si Cebu City Mayor Tomas Osmeña sa Muslim community aron pag-awhag sa tanan nga maghiusa sa pagpangandam ug pagpahugot sa seguridad subay sa kapistahan sa Balaang Bata nga si Señor Santo Niño ug sa Sinulog Festival.
Gihulagway ni Osmeña nga dunay ranggo nga Sultan sa Muslim community nga dako og ikatabang ang Muslim community sa Sugbo alang sa kahapsay ug kalinaw sa dakbayan.
Iya gisanglitanan ang niaging ASEAN Summit diin dako ang natabang sa Muslim community sa pagpakgang sa ilang kaigsuonan gikan sa Mindanao nga planong mohimo og kagubot sa Sugbo.
“Our first line of defense is Muslim community because when the bad come here they contact their friends here, their friend will tell them ayaw na lang, if you come here we will kill you, that’s what happened the last time,” matud ni Osmeña.
Subay niini, nakigtagbo sab ang regional director sa National Commission on Muslim Filipinos, Malo Manonggiring, kang Konsehal Dave Tumulak, deputy mayor for police matters, aron pagpahibawo nga andam sila motabang sa siyudad aron mamentinar ang kahapsay ug kalinaw.
Suportado nila ang kalihukan sa siyudad sanglit gikonsiderar man sab nila ang ilang kaugalingon nga mga Sugbuanon.
Awhag niya sa katawhan ilabi na sa mga Muslim nga magmabinantayon kanunay ug gikinahanglan ang kooperasyon sa tanan ug kun dunay makita nga kadudahan dili magpanuko sa pag-report sa awtoridad.
Hinoon base sa ilang monitoring wala silay nadawat nga report nga dunay grupo sa mga terorista ang nagplanong gubton ang Sinulog karong tuiga.
“Your religion differences is personal, but we have to be united, we have one God, we have one Creator, we should love each other,” sigun pa ni Manonggiring.
Si Tumulak nagpasalamat sa suporta sa Muslim community ilabi na nga moabot sa kapin 100 ka sakop ang ilang peace auxiliary nga ipakatap.
Anha sila mopahimutang sa N. Bacalso Avenue paingon sa dalan Sikatuna pinaagi usab sa pakig-alayon sa kapolisan ug ubang ahensiya sa gobiyerno. (BANAT NEWS)
- Latest
