Daghan ang nitahan apan gamay ra ang nagpa-rehab

CEBU, Philippines - Ang Probinsya sa Sugbo padayon nga makighiusa sa kapolisan sa pagbatok sa ilegal nga drugas pinaagi sa Cebu Provincial Anti-drug Abuse Office (CPADAO).

Ang CPADAO milusad sa nagkadaiyang programa pagsuporta sa kampanya sa kapolisan, apil sa gilusad mao ang Project IFAD kon ang  Integrated Forces Against Drugs; Project YMAD kon Youth Making a Difference; Program SEEK kon  School-based Education Enhances Knowledge on Drug Abuse ug Program LIFT  kon Linking Interest of Families and Teachers. Ang maong mga programa ubos sa Student Assistance Program.

Si Ivy Durano-Meca ang pangulo sa CPADAO nagkanayon nga ang maong mga programa alang sa pagsuporta sa mga drug surrenderers sa probinsya nga gusto na mobiya sa bisyo ug magbag-o.

Apan ang CPADAO mitug-an nga sa pagdaghan sa mga nitahan nga nalambigit sa ilegal nga drugas, wala usab miduol kanila nga gusto mopaubos sa treatment of rehabilitation.

Bisan sa mga empleyado sa mga LGU ug sa Kapitolyo matud ni Meca walay mipadayag nga mopaubos sa rehabilitation.

Laing problema sa CPADAO mao ang pagsaka usab sa gidaghanon sa mga minor de edad nga nitahan.

Sa uwahing record sa CPADAO gikan sa kapolisan di moubos 2 mil na ka mga minor de edad ug ang uban niini mga babaye ang mitahan gikan sa nagkadaiyang lungsod ug dakbayan.

Si Meca nagkanayon nga pipila sa mga mitahan ang mirason nga tungod sa kahadlok nga mapatay ang hinungdan sa ilang pag-surrender.

Si Bise Gob. Agnes Magpale sa iyang bahin nagkanayon nga sukad pa kaniadto suportado na niya ang tinguha ni Presidente Duterte nga wagtangon ang ilegal nga drugas sa nasud.

Alang niya daku ang natabang sa kampanya sa ilegal nga drugas sa kampanya usab nila nga mahunong ang pang-abuso sa mga kababayen-an ug kabatan-onan.  (BANAT NEWS)