2017 maayong tuig pagnegosyo ug kaminyoon

CEBU, Philippines – Mabungahon ug malambuon ang Pilipino sa umaabot nga tuig 2017 sumala pa sa mga mananagna nga mga Sugboanon.

Unang gikahinabi sa Banat News si Madam Remedios Ganados, 65, nga dul-an sa 20 ka tuig nang nipahigayon og pagpamaraha ug pagtag-an sa mga pangutana sa katawhan nga nangita og tubag sa mga tanghaga sa ilang kinabuhi.

Si Ganados, mopahigayon og Tarrot Reading sa tag P150, Ordinary Reading P100  ug Palm Reading P100 ang duha ka kamot.

Matud pa ni Ganados, base sa iyang pagbasa maayo ang dagan sa ekonomiya sa Sugbo ug sa Pilipinas sa sunod tuig diin kadtong adunay tinguha nga magbukas og negosyo dili na angay magduha-duha.

Sumala pa ni Ganados, daghan pang mga infrastructure building ang mobarog sa Sugbo sa sunod tuig. Nangahulogan kini nga daghan pa ang makatrabaho gikan sa pagtukod hangtud nga magsugod na og operate ang mga establisamento niini.

Dugang pa ni Ganados, sa natad sa politika hayag ang ugma niini, apan angayan gayud iampo ang presidente sa nasud President Rodrigo Duterte tungod kay adunay daghang mga tawo ang nagtinguha sa kinabuhi niini.

Matud pa niya, kining gubat batok sa ginadili nga drugas maoy usa sa mga hinungdan ug aduna say mga politiko ang dili makahuman sa ilang mga termino ug daghan usab nila niini ang dunay mga biyahe kanunay sa gawas sa nasud.

Si Ganados nipadayag hinuon nga bisan sa ilang mga panagna, aduna gihapoy magbuot sa tanan nga mao ang Ginoo, hinungdan awhag niya sa katawhan nga magmaampoon sa kanunay.

Samtang si Cirilo " Tatay Eloy" Arepal, kapin na sa 50 ka tuig sa iyang pagpamaraha nitug-an nga ang tuig 2017 “satisfactory success and progress” sa larangan sa business, politics ug marriages.

Matud pa ni Arepal, maayo sa pagbukas sa business ang tuig 2017 diin aduna gayuy kalamboan ug mabungahon kini sa mga magpapatigayon.

Dugang pa ni Arepal, ang tuig 2017 maayo usab alang sa mga nagtinguha nga mosulod sa salag sa kaminyoon ug maayo usab kini nga tuig alang sa pag-ayo sa mga nagtakilid nga mga kaminyoon.

Gitug-an ni Arepal, base sa iyang nakita sa baraha sa pamunoan ni Duterte, daghan naglagot niini ug adunay daghan gusto nga moguba sa administrasyon niini tungod sa iyang pagka “action man.”

Apan iyang nakita nga dili mabuntog si Duterte tungod sa kadaghan sa mga tawong nagmahal niini.

Si Arepal, nipadayag nga hataas gayud ang latason sa mga tawo nga nagtinguha sa pag-ilis sa pang gobiyerno ngadto na sa Federalism tungod kay daghan sa mga tawo ang nakita niya nga mosupak niini.

Gibutyag ni Arepal, aduna gihapon mga katalagman,masugatan ang mga Pilipino sama sa bagyo, sunog, gubat ug uban pa.

Usa ka babaye ang naabtan sa Banat News nga nagpabasa sa baraha kang Ganados nitug-an nga matag bisita niya sa Sugbo magpabasa gayud siya sa iyang kapalaran kay mao kini ang iyang gihimong giya kanunay sa iyang pagpakabuhi.

Ang maong babaye lumad nga taga Davao ug siya miangkon nga daghan na usab mga panagna sa iyang kinabuhi ang natuman. - /EIM) (BANAT NEWS)