Sinulog Grand Parade kutob lang alas 4:30 sa hapon
CEBU, Philippines - Aron dili makahatag og dugang bantayanan, kutob na lang sa alas 4:30 sa hapon ang pagpahigayon sa Sinulog 2017 Grand Parade sa sunod buwan.
Kini maoy gibutyag ni Senior Supt. Rey Lyndon Lawas, deputy regional director for operations.
Aron mahimo kini, usa na lang ka parada ang buhaton sa mga partisipante ug diretso na lang sila mosayaw sa Cebu City Sports Complex.
Si Lawas miingon nga mao kini ang desisyon nga gihatag sa Sinulog Foundation ug sa mayor sa Sugbo nga kutob na lang sa hapon ang parada.
Hugot usab ang seguridad nga ipatuman sa maong adlaw kauban sa mga polis uban ang ubang law enforcement agencies sa pagbantay sa seguridad.
Mibutyag sab si Lawas nga mas maayo kung wala nay “street party” ilabi na niadtong mga mag-inom daplin sa dalan nga maoy mahinungdan sa gubot. Apan gisaad sa kapolisan nga andam sila sa kun unsa may mga mahitabo mapagamay man nga sitwasyon o mapadako.
Sa laing bahin, mga kandidata sa Miss Universe gikatakda usab nga moabot dinhi sa Sugbo sa Enero alang sa himuong photo shoot nga kabahin sa ilang mga kalihokan alang sa pagpahigayon sa indigay sa kaanyag nga dinhi mahitabo sa Pilipinas sa sunod tuig.
Matud pa ni Lawas, gibanabanang kinse ka mga Miss Universe candidates ang mangadto sa Oslob alang sa photo sa Enero 17 ug ingon man sa Lapu-Lapu City. (BANAT NEWS)
- Latest
